Här President,
Esou wéi den Artikel 80 vum Chambersreglement et virgesäit, bieden ech Iech, dës parlamentaresch Fro un den Här Minister fir Educatioun, Kanner a Jugend weiderzeleeden.
Um Site vum Script steet ze liesen, dass d’Aarbechten un der Broschür „Staark fir d’Liewen – prett fir däi Beruff“, déi a verschiddene Bänn erauskënnt a sech un d’Schüler vun der Beruffsausbildung adresséiert, 2021 hätte sollen ofgeschloss sinn. Zil vun dëser Broschür ass et, d’Schüler beim Léiere vum techneschen a professionelle Vocabulaire ënner Berécksiichtegung vun de Sujeten aus dem Enseignement général z’ënnerstëtzen. Doriwwer eraus soll eng transversal Verbindung tëschent de Sproochen, der „Education physique“, der „Education à la citoyenneté“ an der „Education à la santé“ hirgestallt ginn.
An deem Kontext wéilt ech folgend Froen un den Här Minister fir fir Educatioun, Kanner a Jugend riichten:
- Wéi eng Bänn vun der Broschür „Staark fir d’Liewen – prett fir däi Beruff“ si bis elo fäerdeggestallt a wéi eng stinn nach aus?
-
Gëtt dëst didaktescht Material konsequent an der Beruffsausbildung agesat?
- Wa jo, a wéi enge Formatioune kënnt dat Material zum Asaz a wéi gesäit déi praktesch Ëmsetzung aus?
- Wann net, firwat net?
-
Ass virgesinn, a verschiddene Formatioune vun der Beruffsausbildung nieft dem Däitschen an dem Franséischen och Englesch unzebidden?
- Wa jo, ënner wéi enger Form a vu wéini un?
- Wann net, firwat net?
- Wier et méiglech, e Sproochemodul unzebidden, bei deem déi dräi genannte Sprooche behandelt ginn?
-
Ganz allgemeng, ass virgesinn, de Sproochenunterrecht an der Beruffsausbildung ze reforméieren?
- Wa jo, no wéi enge Krittäre soll déi Upassung geschéien a wat soll konkret geännert ginn?
- Wann net, firwat net?
Här President, ech bieden Iech, mäin déifste Respekt unzehuelen.
Martine Hansen
Co-Fraktiounspresidentin